Верасень 2016 г. – 40 гадоў з часу адкрыцця Брэсцкай дзіцячай школы выяўленчых мастацтваў імя А. А. Алонцава (1976)
Дзіцячая мастацкая школа горада Брэста была адкрыта ў верасні 1976 года па ініцыятыве мастака Аляксандра Аляксандравіча Алонцава (1941–2013), які і стаў яе першым дырэктарам і выкладчыкам. У тым, што такая школа з’явілася, заслуга таксама тагачаснага начальніка аддзела культуры Брэсцкага гарвыканкама Паўла Андрэевіча Жмайліка (1931–2007). Гэта была першая ў Беларусі дзіцячая мастацкая школа, у сярэдзіне 1980-х у рэспубліцы было ўжо 20 падобных школ.
2015 г. – 75 гадоў з часу адкрыцця (1940) у г. Брэсце першай беларускай сярэдняй школы
Праз два месяцы пасля далучэння Заходняй Беларусі да БССР бюро Брэсцкага абкама КП(б)Б 14 снежня 1939 года зацвярдзіла мерапрыемствы па арганізацыі Грамадскай асветы. Згодна з імі, усе школы сталі дзяржаўнымі з адзінымі вучэбнымі планамі. Некаторыя з іх былі рэарганізаваны ў сярэднія, няпоўныя сярэднія і пачатковыя.
1 верасня 2014 г. – 70 гадоў з часу аднаўлення работы ў г. Брэсце музычнай школы (1944)
Гісторыя Брэсцкай дзіцячай музычнай школы № 1 пачалася ў 1939 годзе. Яе першы прыём склаў 75 чалавек, якія займаліся на дзвюх спецыяльнасцях: фартэпіяна і мандаліна.
1 верасня 2013 г. – 35 гадоў з часу адкрыцця ў г. Высокае Камянецкага раёна дзіцячай музычнай школы
Дзіцячая музычная школа ў г. Высокае Камянецкага раёна Брэсцкай вобласці распачала сваю дзейнасць у 1978 годзе. Размясцілася па вуліцы Кірава ў двухпавярховым будынку, якi пабудаваны ў пачатку XXстагоддзя (раней тут у розны час размяшчалiся ваенкамат, інтэрнат, прыватныя кватэры).